بقلم/ أسامة شاهين
«أنا الجاني» سلسلة من المقالات لنقد السلبيات في مجتمعنا التي قد يفعلها بعض الأفراد بشكل متعمد أو غير متعمد والتي تؤثر بدورها على الفرد والمجتمع على المدي القصير والبعيد.. وتم صياغتها في شكل دارمي باستخدام أسلوب بسيط لتناسب كل المستويات الثقافية.
I said Yes
أنا كنت تايهه لحد مالقيتك ..
بوستات كتير حب أول ماتحصل خطوبة أو قراءة فاتحة من النوع دا بشكل غير طبيعي.. في أول مكالماتهم.
-ألو أزيك يا حبيبي عامل أيه.
=الحمد لله يا روحي.
وبعدين مكالمة طويلة عريضة وعاطفية.. وسيشن خطوبة وهو ماسك أيديها وحاضنها والصور تنزل وفرح وتم تغيير صورة البروفايل بصورته وشوية حاجات أنتو عارفينها وهنفترض أن الخطوبة تمت على خير واتجوزوا.. وبعد مرور شوية وقت.
=مالك يا بني مضايق ليه وكل شوية زعيق أنت ومراتك.
-والله يابا أنا مش عارف دي الإنسانه إللي حبتها قبل الجواز ولا لا، اتغيرت أووي.
=مالك يا بنتي هو مفيش غيرك أنتي وأحمد اللي كل يوم خناقات.
-يا ماما أحمد اتغير مش دا أحمد إللي كنت أعرفه قبل الجواز.
الحقيقة هو أحمد إللي كان قبل الجواز هو نفسه أحمد إللي كان بعد الجواز، وبرضو منى إللي كانت قبل الجواز هي برضو نفس الإنسانه إللي بعد الجواز، أمال يا عم أيه إللي حصل وليه حياتهم قبل الجواز إللي كلها حب ومودة متكونش هي نفس الحياة إللي بعد الجواز.
تعالي يا عم نشوف الغلط فين..
-الأول لازم نعرف أن الطبيعي أن فترة الخطوبة متكملش لكن إللي مش طبيعي إنها تكمل.
=أيه الكلام إللي بتقوله دا.
-أقولك فترة الخطوبة اتعاملت في الشرع والعرف كـ «فترة تعارف» وتركز على فترة تعارف دي لأن احنا مش فاهمنها كويس.
-طب فهمنا يا خويا.
=فترة الخطوبة فترة تعارف إللي هو بمعني كل واحد يكون بطبيعته مش متكلف ولا يحاول أن يثبت أنه واد مفيش منه اتنين وأنه فارس أحلامها ولا هي تثبت إنها سندريلا وست البنات.
-يعني يبقوا وحشين ولا يتعاملوا بطريقة مش حلوة ويبانوا وحشين يعني ولا أيه.
=لا طبعا المطلوب أن كل واحد فيهم يتعامل بطبيعته بس إللي هو كل واحد عارف مميزات وعيوب التاني ويشوف هل هيعرف يتعايش مع العيوب دي ولا لا.. لأن محدش كامل وكلنا عيوب وكل واحد ممكن يتماشي مع عيب معين والتاني لا.. فالخطوبة اتعملت عشان كدة ولو الطبيعي إنها تكمل كنا لغينا مصطلح الخطوبة وكان يبقي كتب كتاب ودخلة على طول.
-يعني أيه المطلوب؟
=مش مطلوب منك غير أن يكون كل فرد على طبيعته عشان كل طرف ميتصدمش بحقيقة التاني بعد الجواز وكل واحد يقول على الطرف التاني مش دا الإنسان إللي كنت أعرفه مع أن هو هو الإنسان بس كل طرف مداش نفسه فرصة أن يعرف الإنسان إللي قدامه إللي هو شريكه.. الحقيقة أن فسخ خطوبة أرحم من طلاق أو جري محاكم قدام.
التعليقات