الكشري بالصلصة مع الباذنجان مخلل.. أكلات موفرة في رمضان

كتبت: سماح محمد

الكشري بالصلصة من الأكلات الشعبية المشهورة والمحببة عند الشعب المصري، وهو خليط من مكونات مختلفة عن بعضها، لكن الطعم متميز وخرافي.

ووجود إضافات أخرى مع طبق الكشري بالصلصة، زي مخلل الباذنجان وعصير السوبيا، يعملولنا إفطار رمضاني مشبع وموفر ومتكامل.

هنعمل معاكو النهاردة

كشري مصري بالصلصة- باذنجان مخلل- سوبيا.

2 كوب أرز- كوب عدس بجبة منقوع- كوب شعرية- مكرونة صغيرة مسلوقة.

ومكرونة اسباجتي مسلوقة- حمص مسلوق- بصل محمر- ثوم- عصير طماطم- زيت- كمون- شطة- ملح وفلفل أسود.

أولاً بنجيب حلة ونحط فيها زيت وننزل بالبصل المحمر وأحط العدس بجبة منقوع وعليها مياه.

وعليها كمون وملح ونجيب طاسة ونحمر الشعرية نحط الشعرية المحمرة علي العدس بعد ما استوي.

ثانيًا بنحط الرز معاهم وحبة كمون ومياه لو احتاجت ونوطي النار عليها لحد ما تستوي.

بالإضافة إلى إننا بنجيب طاسة تانية ونحط بصلة وندبلها وتوم وننزل بعصير الطماطم وشطة عليها وملح وفلفل وكمون ونسيبها لحد ما تتسبك.

ونعمل الدقة ملح وخل وتوم وكمون ننزل بالتوم وعليه كمون وشطة وملح عليهم وحبة مياه.

وبعدين نغرف الكشري وعليه المكرونة بالصلصة.

1/2 كيلو باذنجان- توم- ملح- كمون- خل- فلفل حار- ليمون- زيت للقلي.

نجيب طاسة ونجيب الباذنجان ونفتحه فتحة صغيرة ونقليه.

وبعدين بولة نحط فيها فلفل والتوم وكمون وملح وعصير الليمون وخل وملح ونقلبهم مع بعض ونطلع الباذنجان ونحشيه بالخلطة.

كوب دقيق أرز- كوب لبن بودرة- كوب جوز هند- كوب سكر بودرة- ملعقة صغيرة ليمون- معلقة صغيرة فانيليا.

لعمل مشروب السوبيا بنجيب بولة ونحط عليها اللبن والدقيق وسكر وجوز الهند وفانيليا ومعلقة ليمون.

ونجيب شفشق ونحط فيه خمس معالق من الخلطة عليه مياة ولبن.

ثم بندخله الثلاجة لمدة نص ساعة وبعدين نطلعه، ونقدمه في أكواب وبالهنا والشفا.